صينية الجلاش بالفراخ

الأربعاء ديسمبر 02, 2009 5:20 am

بسم الله الرحمن الرحيم

صينية الجلاش بالفراخ

نقول المقادير

علبة جلاش أي نوع

لو المقاس متوسط..تكفينا نص فرخة مسلوقة و مقطعة نسايل او قطع صغيرة

علبة كريمة خضار حجم متوسط

بصلة مقطعة قطع صغيرة

عدد 2 جزرة مبشورة

عدد 2 فلفل اخضر رومي..مفيش أخضر..هاتي أصفر..مفيش أصفر..هاتي أحمر..مش هنخسر بعض علشان الفلفل يا جماعة.

نيجي بأة للطريقة..

أهم ما في الموضوع ازاي بنعمل الحشوة اللي تجنن دي..

بنجيب معلقتين تلاتة زيت و نحطهم على النار و نضيف البصل المقطع..و بعد ما اللون يبدا يغمق شوية. نحط الجزر و بعده الفلفل و بعد دقايق ، بنحط الفراخ المسلوقة المقطعة قطع صغيرة أو ( نسايل ). و أخيرا بنضيف الكريمة السايلة و تكون النار هادية جدا و بنسيبها دقايق مش كتير. مع ملح و فلفل بسيط.

و برة بنحضر الصينية متوسطة الحجم. و نحط الجلاش راقات زي ما احنا متعودين ..بس طبعا في الاول لازم تكون الطبقة سميكة, و نحط الخلطة دي على تلات مرات مثلا ما بين كل طبقة و التانية.

و بنشربها من فوق بشوية شوربة مش كتير علشان متعجنش

مقولوكوش على طعم الخلطة دي بيبقى عامل ازاي

بألف مليون هنا و شفا