الســت بتاعتي .. ست الستات ((امرأة غير صالحة للاستخدام الآدمى))

الأربعاء نوفمبر 25, 2009 6:29 pm

إهداء
للست بتاعتى

.................
ست الستات
......................

.................

الست الجايَّة تنظم أفكارى
بتبعتر كل الأوراق
على بعض
عمّاَلة تخربش فى مشاعرى
وتقطَّع فى الأحاسيس الباقية
شغلتها تدمر أعصابى
لانا قادر أغيَّر فيها
ولا قادر ألاقى حد يخفف عنى
ويخلينى اتحمل
أو يجعلها يوم تتنازل
عن أفكارها
الغير مقبولة
ف شرع الناس
مابتسمعشى لحد
غير لدماغها الأوسخ
منه مافيش
الست بتاعتى
كيفها تدمَّر بيتها بإيدها
مابتعرفشى تضَّحى لحد
ولا حتى ولادها
الست بتاعتى
كائن صعب
التفسير
كائن صعب التغيير
الست بتاعتى أبرد منها مافيش
أتعب منها مافيش
أأدب منها مافيش
أطيب منها مافيش
لكن طيبة طفل
طفل بيهوى يدمَّر كل حاجاته
الست بتاعتى
من أول يوم
قرفانى
الست الجاّيَة تريَّح
تعبانى
الست بتاعتى
غير كل الستات
ملحوظة تؤخذ فى الحسبان
على فكرة
مش قاصدى بالست بتاعتى " بتاعتى "
دلأن الست بتاعتى مش عايشة فى طوعى
دايما ضدِّى
ولهذا
مايصحش أقول عليها الست بتاعتى
تنويه م الواجب أقوله
الست بتاعتى
اللى كلامى عليها
مش هى الست بتاعتى
أنا باقصد بيها
البطلة النايمة
فى قلب قصيدتى
دلأن الست بتاعتى ست الستات
وعشان الوضع العام علِّمنى
إن الستات مالهومش
" ست "
فلنترك هذا الموضوع لظروفه
ولا حتى نجيب أى كلام
ع الست بتاعتى
ولا حتى بتاعتك
ولا حتى بتاعة واحد
صاحبى وصاحبك
وانخللى كلامنا عن ست
موجودة فى وسط الستات
مع إنِّى أشك ف هذا الأمر
ما علينا
ملحوظة تؤخذ فى الحسبان
إتعودت
وانا باكتب أى قصيدة
أكتب بلسانى
وكأنِّى باكتب
حالى
أو بالمعنى الأحرى
بلسان الذات
الذات
التايهة عشانها
الذات
العايشة تدوَّر عن حاجة
يمكن يوم
تشفع ليها فى يوم واسامحها
فاانا باستسمح كل القراء
وانا باكتب
هابدأ قولى
" بالست بتاعتى "
عشان الشعر يكون أكثر صدقاً
وانا شاعر ممكن أفلت
لو
فرضا يعنى الست بتاعتى افتكرت
إن اقصدها
ودا طبعاً جايز بعد الشر هايحصل
ساعتها هاقول:
أنا باتقمص قصة جديدة
وانتى ...
المفروض ان انتى حبيبتى
وحبيبتى تتمنالى
إن أكون شاعر متجدد
وساعتها ممكن أو جايز يمكن
كدبة تعدِّى عليها
ما علينا
ملحوظة تؤخذ فى الحسبان
إلى كل رجال الدنيا
إياك تتجرأ وانت بتقرا قصيدتى
تقراها قدام الست بتاعتك
دلأنِّى خايف على مصلحتك
مش علشان ان سيادتك من الجنس بتاعى وبس
لأ
علشان متعود أخاف على قرائى
دا فْ حالة إن بفرض
الناس لساها بتقرى
جنب الألف قناة فى الدش
والشات والنت
ما علينا
هذا الموضوع مش وقته
نفتح له قصيدة المرة الجايَّة
نرجع للموضوع إياه
ها رجع تانى وافكر
كل رجال الدنيا
إوعاك تنسى وتقرى قصيدتى
قدام الست بتاعتك
مش راح تفلت
لو حصلت كبسة
أنا شاعر ممكن أفلت
وعموماً بالفرض خلاص حصلت كبسة
إياك ترمى قصيدتى فى قلب الأرض
أو تتسرع وتخبيها فى وسط هدومك
نفى النفى طبعاً عارف ..
إثبات .
كده ها تركب نفسك غلطة
والشك يزيد
وها يحصل بينكوا مشاكل
وانا عارف
مش ناقصة
تعرف أسلم حل
لو حصلت كبسة
ممكن تعمل إيه
1:ـ كشر وشك
واشتم فيَّا
قول :
الشاعر دا مجنون
كداب ..... معقول ؟!!
الست بتاعته بهذا الشكل
2:ـ ممكن تعمل نفسك متضايق
واتصعَّب واستغفر ربك
قول :
الشاعر دا غلبان
طب ليه مستنى وصابر
جايز علشان بينها وبينه عيال
ياه
إلى هذا الحد تكون الست بتاعته بهذا الشكل
أو ممكن
3:ـ اضحك .. قول :
ياه
طب ليه مش لأ
علشان مش شايف حد فى عينى
غيرك إنتى وبس ياروحى؟
فاكر كل الستات تشبهلك !!
هاتلاقى الست بتاعتك مبسوطة وتضحك
وتقولك علشان بس تقدر
وتعدى الليلة
شفت ازاى إنى انا شاعر خايف على قرائى
كبسة
المرة دى الكبسة عليا
تعرف ليه
دلأنى القراء بتوعى مش من جنسى وبس
م الوارد طبعاً م الجنس التانى
فاانا لازم أصلَّح
كل كلامى
وأخاف
على كل القراء
ولهذ ها قول
إلى كل الستات فى الدنيا
أنتن حبايبى
وحياة الست بتاعتى
مقصدتش واحدة مابينكم
أنتو ملايكة
الست اللى انا باتكلم عنها
هى
" الست بتاعتى"
الماشية بمبدأ خالف تعرف
وانا خايف أعرف
إن انا راجل مش عايز اعيش
فاانا مضطر اتحمل
واستنى عليها شوية
شوية لإمتى ؟
شوية لحد ماكل الناس تمسكهالى وولع فيها
الماشية خلف خلاف
ماشية ضد الشرع
والشرع ادانى حقوق
مش عارف ليه؟!
مش راضى استعمل حقى
علشان لعيال
وانا كائن عاشق للطفل
عايش مع كائن عاشقة الصوت العالى
إيدها بتسبق كل كلامها
بتصوت زى الطفلة وتتبحلص ع الأرض
قدام الناس مش فارقة
الست بتاعتى مابتخزاش على عينها
بتسمع كل جيرانى
م الأول جار للسابع
لو مرة تفكر تسمعنى وتمشى ف طوعى
وتطلق صوتها العالى
تبقى خلاص مشاكلنا اتحلت
وعموماً سيبك من صوتها العالى
البيت كان دايماً هس
آهى جاية بتعمل حس لبيتى
علشان الناس فى الشارع
مايجوش يفتكروا البيت كان فاضى
أوف...
ماعلينا
نرجع للموضوع اياه
الست بتاعتى
مابتعرفشى
* كلمة حاضر..
*واللى تشوفه ..
*وانت الراجل واحنا معاك
والدفة ف ايدك نمشى وراك
الست بتاعتى ماشية معايا
بمبدأ
ند الند
قاموس الدنيا بتاعها
كان أول كلمة قارتها كلمة " لأ "
*أنا مش عاملة
*أنا مش رايحة
لأ وابتحلف
تصَّور
واتخيل الست بتاعتك مرة بتحلف
ولا مرة بترجع فى كلامها
مش بس بتحلف
لأ
دابتحلف واتنفذ
الست بتاعتى ياما وياما بيحصل
واتكسر كل كلامى
تعرف
الست بتاعتى
تنفع راجل
ممنوع الرقة
لو فرضا مرة من مليون مرة بتغلط
واتفكر مرة تصالح
ياه
تقعد وتعاتب روحها كتير
طبعا مش علشان الغلطة
لأ
علشان مرة تنازلت
إزاى الهانم تتأسف
وتعاقب روحها
ولهذا تفكر تانى ف غلطة وتتمسك
وبهذا تكون ثأرت لدماغها الناشف
واللى منشف كل حنان فى البيت
والله مابضحكالست بتاعتى تنفع راجلياراجل؟
مش للدرجة دى !!
علشان كام مرة مسكت لك شبشب
باتهزر يابنى
ومافيش بين الراجل والست بتاعته
أى خلاف ع الشبشب
مايصحش تنطق كلمة " تنفع راجل "
علشان كام مرة تكلم فيها ورجليها ف وشك
وتنادى عليك من أى مكان فى البيت وبلهجة أمر
ولا تنادى عليها وماتردش
وبتستنى تروح تناديها هناك
خليك هادى
لو جت تتنرفز ابعد عنها وسيبها
روح على برة
لما تعدى الأزمة
وده طبعاً أحسن لك
لتهيج وتصوت وتلم عليك الناس
الست بتاعتك غلبانة
مش لاقية حد يعدُّل فيها
كل الناس حواليها ملهى ف روحه
والله حالها بيصعب
وبيتعب
الناس حواليها
واللى يعيش ياخد حقة
واللى مايعرف
ياكشى يولَّع
سيبها تكسر فى الحاجة
وترزع فى بيبان البيت
وتكسر فى إزازه
سيبها تفشى السر
سيبها تروح النار واتسلم تقارير يومية وتحكى كل التفاصيل عن بيتك
سيبها تولعمشكلتك انك بتخاف م الناس
والوضع العام
بتخاف من أى فضايح
هى العكس
اللى يدور فى دماغها لازم يتنفز
لو حتى الناتج
أى فضايح
تعرف دايما بتقول
"ماعرفشى اعمل حاجة حد يقول لى عليها"
يعنى
ممنوع الطاعة
لو حتى رب الكون الفارض هذا الأمر
الست بتاعتى
عايزة تعيش على كيفها
وانا لازم أعيش على كيفى
لكن
أعيش بالشرع
ياه
تتصور
قربت أصدق
إن الست بتاعتى بهذا الشكل
على فكرة الست بتاعتىست الستات
لكن الست بتاعتى التانية

ست غير كل الستات

ملحوظه

القصيده ما هي الا وحي من خيالي

ولا يوجد منها اي شئ في الواقع

الأربعاء نوفمبر 25, 2009 9:47 pm

تسلم ايدك برنس

الخميس نوفمبر 26, 2009 12:38 am

اسمحي دي مش عايزه الرب بالنار
دي عايزه قنبله نوويه تنسفها و تنسف حتي اثارها
هههههههههههههه
تسلم ايدك برنس

الســت بتاعتي .. ست الستات ((امرأة غير صالحة للاستخدام الآدمى))

الســت بتاعتي .. ست الستات ((امرأة غير صالحة للاستخدام الآدمى))

رد: الســت بتاعتي .. ست الستات ((امرأة غير صالحة للاستخدام الآدمى))

رد: الســت بتاعتي .. ست الستات ((امرأة غير صالحة للاستخدام الآدمى))